अंबड तालुकाजालना क्राईम

वडीकाळ्या येथे पती पत्नीने आपल्या राहत्या घरी गळफास घेऊन आत्महत्या

अंबड प्रतिनिधी

images (60)
images (60)

जालना जिल्ह्यात अंबड तालुक्यातील वडीकाळा येथे पती पत्नीने आपल्या राहत्या घरी गळफास घेऊन आत्महत्या केली . शनिवारी 27 ऑगस्ट रोजी सकाळी 6 ते 7 वाजण्याच्या दरम्यान ही घटना उघडकीस आली . खाजगी फायनान्स कंपनीच्या कर्जाची परतफेड होत नसल्याने दोघांनी आपली जीवनयात्रा संपविली असल्याची प्राथमिक माहिती समोर येत आहे . अंबड तालुक्यातील वडीकाळा येथील संजय भाऊराव ढेबे ( 45 ) व पत्नी संगीता संजय ढेबे या दांपत्याकडे वेगवेगळ्या फायनान्स कंपन्यांचे कर्ज होते .

तसेच ट्रॅक्टरच्या हप्त्याचीही परतफेड करणे बाकी होते . ट्रॅक्टरचा 82 हजार रुपये रुपये हप्ता शिल्लक होता . यावर्षी पावसाने हुलकावणी दिल्याने खरीपाचे पीक देखील धोक्यात आले आहे . फायनान्स कंपनीच्या वारंवार हप्ते भरण्याच्या तगाद्याने व शेतात देखील उत्पन्न मिळत नसल्याने त्यांच्यावर दुहेरी संकट ओढवले . याला कंटाळून दाम्पत्याने स्वतःच्या घरात गळफास घेऊन आपली जीवनयात्रा संपवली . ही खळबळजनक घटना गोंदी पोलीस ठाण्याच्या हद्दीत घडली आहे .

सकाळ झाली तरी घरातुन कोणी बाहेर येत नसल्याने घराशेजारी राहत असलेल्या सिंधुबाई शामराव ढेबे यांनी या पती पत्नीला गळफास घेतलेल्या अवस्थेत बघितले . त्यानंतर गावातील सरपंच , उपसरपंच , पोलीस पाटील यांना याची माहिती दिली . पोलीस पाटील राजेंद्र गाडेकर यांनी या घटनेची माहिती गोंदी पोलीस ठाण्याला कळविली . यावेळी घटनास्थळी बघ्यांची मोठ्या प्रमाणात गर्दी झाली होती . एक एकर शेती असल्याने ते ऊसतोड तसेच मुकादम म्हणून स्वतःच्या ट्रॅक्टरवर उस वाहतूक करण्यासाठी देखील जात होते . अशी माहिती त्यांच्या नातेवाईकांनी दिली . आत्महत्या केलेल्या दांपत्याला पवन हा एक मुलगा तसेच सुन आहे . व एका मुलीचे लग्न होऊन ती सासरी आहे . या दांपत्याने कर्जाला कंटाळून आत्महत्या केल्याने परिसरात हळहळ व्यक्त होत आहे .

सुखापुरीच्या प्राथमिक आरोग्य केंद्र वैद्यकीय अधिकारी शितल शिनगारे यांनी या मृतदेहांचे शवविच्छेदन केले . गोंदी पोलीस ठाण्यात अकस्मात मृत्यूची नोंद करण्यात आली असल्याची माहिती बीट जमादार मदन गायकवाड यांनी दिली . घटनास्थळी पोलीस निरीक्षक शीतलकुमार बल्लाळ यांनी भेट दिली . संगीता ढेबे यांच्याकडे स्वतंत्र फायनान्सचे 60 हजार रुपये , चैतन्य फायनान्सचे 45 हजार रुपये व संजय ढेबे यांच्याकडे महिंद्रा कोटकचे ट्रॅक्टरवर 1 लाख रुपये तसेच श्रीराम फायनान्स 50 हजार रुपये व शेतीसाठी काही कर्ज घेतल्याची माहिती मिळत आहे . या कर्जाची परतफेड होत नसल्यामुळेच या दाम्पत्याने आत्महत्या केली असल्याचे मृतकाचे नातेवाईक शंकर ढेबे यांनी सांगितले .

Related Articles

Back to top button
error: Content is protected !!